चीज पिज करी - Cheese Matar Curry

Cheese Peas Curry in English

वेळ: २० मिनिटे (ब्राऊन ग्रेव्ही तयार असल्यास)
वाढणी: ४ जणांसाठी

साहित्य:
१ कप वाफवलेले मटार
२ चीज क्युब्ज, लहान तुकडे
३ टेस्पून तेल
३ टेस्पून कांदा, बारीक चिरून
१/२ कप टॉमेटो, बारीक चिरून
३/४ कप ब्राऊन ग्रेव्ही (आधी तयार करून ठेवावी)
१/२ कप काजू-मगजबी पेस्ट (आधी तयार करून ठेवावी) (टीप २ पहा)
दिड टिस्पून लसूण पेस्ट
१/२ टिस्पून आले पेस्ट
१ टिस्पून गरम मसाला
२ टेस्पून खवा किंवा १ टेस्पून मिल्क पावडर
१/२ टिस्पून लाल तिखट
१/३ कप पाणी
२ टिस्पून बटर
चवीपुरते मीठ

कृती:
काजू-मगजबी पेस्ट करण्यासाठी १/४ कप काजू आणि १/४ कप मगजबी पाण्यात घालून उकळवावे. नंतर पाणी काढून टाकावे आणि बारीक पेस्ट करावी.

१) कढईत तेल गरम करावे. त्यात कांदा लालसर होईस्तोवर परतावा. नंतर आले-लसूण पेस्ट परतावी. टॉमेटो घालून एकदम मेण होईस्तोवर परतावा.
२) वाफवलेले मटार घालून मिक्स करावे. १-२ मिनिटे परतून ब्राऊन ग्रेव्ही, काजू पेस्ट आणि गरजेपुरते पाणी घालावे. मंद आचेवर ५ मिनिटे शिजू द्यावे.
३) गरम मसाला, खवा, लाल तिखट, बटर, आणि मीठ घालावे. मंद आचेवर ४-५ मिनिटे शिजवावे. सर्व्ह करताना चीजचे बारीक तुकडे घालून मिक्स करावे. लगेच सर्व्ह करावे.

टीप:
१) काजू पेस्ट भाजीला छान क्रिमी टेस्ट येते. पण आवडत असेल तरी २-३ टेस्पून क्रीम सर्व्ह करताना घालू शकतो.
२) मगज बी म्हणजेच कलिंगडाच्या बिया. या बिया सुकवून आतील पांढरा भाग वापरला जातो. सोललेल्या बिया किराणा मालाच्या दुकानात सहज मिळतात.