भाताचे वडे - Bhatache Vade

Rice Wada in English

वेळ: १५ मिनिटे
१२ ते १५ मध्यम वडे

साहित्य:
१ कप भात (शिळा किंवा ताजा कोणताही चालेल)
ज्वारीचे पीठ (गरजेनुसार)
१ टेस्पून तांदुळाचे पीठ
१/२ टिस्पून जीरे, १/४ चमचा हळद
२ टिस्पून मिरचीची भरड पेस्ट
१ टिस्पून धणेपूड
मुठभर कोथिंबीर बारीक चिरून
चवीपुरते मीठ
तळण्यासाठी तेल

कृती:
१) भात जर फडफडीत असेल तर पाण्याचा हबका मारून वाफवून नरम करून घ्यावा. मायक्रोवेव्हमध्ये केल्यास पटकन होईल.
२) नरम झालेल्या भातात जीरे, हळद, मिरची, धणेपूड, कोथिंबीर आणि मीठ घालून मिक्स करावे. तांदुळाचे पीठ घालावे आणि मळावे.
३) नंतर भातात मावेल इतके ज्वारीचे पीठ चमच्याने घालावे. मळून अंदाजाने पीठ घालावे. (१ कप भाताला साधारण १/२ ते ३/४ कप पीठ लागेल.). थोडे तेल हातावर घेउन गोळा मळावा.
४) पीठाचे एक दिड इंचाचे गोळे करून हातावर थापावे (चिकटू नये म्हणून हाताला थोडे तेल लावून घ्यावे). मधे एक भोक पडून गरम तेलात मध्यम आचेवर तळावेत.
५) लाईट ब्राउन रंग आल्यावर तेलातून काढून टिश्यू पेपरवर ठेवावे. गरमच खायला द्यावे. या वड्यांबरोबर टॉमेटो सॉस, किंवा नारळाची चटणी छान लागते.

टीपा:
१) नेहमी आदल्या दिवशीचा भात उरला कि फोडणी भात करण्यापेक्षा असे वडे केल्यास चवीत बदलही होतो आणि भात आनंदाने संपतो.
२) आवडीप्रमाणे कणिक, बाजरी अशी पीठे घालू शकतो.
३) हे वडे गरमच चांगले खुसखुशीत लागतात. त्यामुळे शक्यतो लगेच खावेत. गार झाले कि मऊ पडतात.
४) लहान मुलांसाठी हे वडे बनवण्यासाठी त्यात मिरची घालू नये. तसेच ताज्या भाताचे बनवावे.