टोफू चटपटा - Chatpata Tofu

Tofu Chatpata in English

वेळ: १५ ते २० मिनिटे
वाढणी: २ जणांसाठी

साहित्य:
२०० ग्राम टोफू
२ टिस्पून आलेलसूण पेस्ट
१  मध्यम टॉमेटो, बारीक चिरून
२ मध्यम कांदे, मोठे तुकडे (पाकळ्या विलग कराव्यात)
१ मध्यम भोपळी मिरची, मध्यम तुकडे
१/२ कप कोथिंबीर, बारीक चिरून
२ टेस्पून पुदिना, बारीक चिरून
२ हिरव्या मिरच्या, बारीक चिरून
२ टेस्पून बेदाणे
१ टिस्पून गरम मसाला
१ टिस्पून चाट मसाला
२ टेस्पून कॉर्न फ्लोअर
१ + २ टिस्पून तेल
चवीपुरते मीठ

कृती:
१) टोफूचे मध्यम तुकडे करावेत. कॉर्न फ्लोअर आणि थोडेसे मिठ घालून मिक्स करावे. त्यात टोफूचे तुकडे घालून टॉस करावे. नॉनस्टीक तवा घेवून त्यावर १ चमचा तेल पसरावे. तवा मंद आचेवर गरम करावा. त्यावर टोफू अरेंज करून सर्व बाजू थोडाशा क्रिस्पी आणि लालसर होईस्तोवर परतावे. त्यावर गरम मसाला आणि चाट मसाला भुरभुरावा.
२) कढईत २ टिस्पून तेल गरम करावे. त्यात आलेलसूण पेस्ट आणि मिरची परतावी. त्यात कोथिंबीर, पुदिना आणि कांदा घालून मिनिटभर परतावे. नंतर भोपळी मिरची घालून मिनिटभर परतावे.
३) टॉमेटो घालून ते मऊ होईस्तोवर परतावे. आता बेदाणे आणि रोस्ट केलेले टोफुचे तुकडे घालावे. नीट मिक्स करावे. दोनेक मिनिटे परतावे. परतल्याने बेदाण्यातील गोडवा बाहेर पडतो.
तयार टोफू चटपटा गरमागरम सर्व्ह करावे.