खरवस - Kharwas

Kharwas in English

वेळ: २५ मिनिटे
वाढणी: ३० ते ३५ मध्यम तुकडे (७ ते ८ जणांसाठी)

साहित्य:
१ लिटर पहिल्या दिवसाचा दुधाचा चिक (खाली महत्त्वाची टिप नक्की वाचा)
१ लिटर दुध
दोनशे ते अडीचशे ग्राम साखर (साधारण १ पाणी प्यायचे फुलपात्र)
२-३ चिमटी केशर
१/२ टीस्पून वेलचीपूड
मोठा कुकर
२ कुकरच्या आतील डबे (टीप २ पहा)

कृती:
१) केशर अगदी थोडे कोमट करून पाव वाटी दुधात भिजत घालून ठेवावे.
२) चिक आणि दुध एकत्र करून त्यात साखर घालावी. साखर विरघळेस्तोवर ढवळावे. चव पाहून लागल्यास अजून साखर घालावी.
३) केशर आणि वेलची पूड घालून मिक्स करावे.
४) तयार मिश्रण कुकरमध्ये भात शिजवतो तसेच शिजवून घ्यावे.
कुकरचे २ मोठे डबे घ्यावे. डब्यात तयार मिश्रण सारखे विभागून घालावे. कुकरच्या तळाशी दीड इंचभर पाणी घालावे. एक डबा अलगदपणे पकडीच्या मदतीने आत ठेवावा. त्यावर ताटली ठेवावी. त्याच्या डोक्यावर अजून एक डबा ठेवावा. वर अजून एक ताटली ठेवावी. झाकण लावून २ शिट्ट्या कराव्यात. आच बारीक करून मिनिटभराने बंद करावी.
५-८ मिनिटांनी कुकरचे प्रेशर गेल्यावर झाकण काढून दोन्ही डबे बाहेर काढावेत. गार होईस्तोवर हवेवर उघडेच ठेवावे.
कोमटसर झाले की खाल्ले तरी चालते. पण फ्रीजमध्ये गार करून खाल्ल्यास अजून स्वादिष्ट लागतात.
खरवस फ्रीजमध्ये ८ दिवस सहज टिकतो.

टीप:
१) चिक पहिल्या दिवसाचा असल्यास दाट असतो त्यामुळे त्यात तेवढेच दुध घालावे लागते (१ लिटर चिकास १ लिटर दुध)
पण जर दुसऱ्या दिवसाचा चिक असल्यास निम्मे दुध लागते. आणि तिसऱ्या दिवसाला निम्म्याहून थोडे कमी लागते. चिक विकत घेताना तसे विचारून घ्यावे.
२) कुकरच्या आतील डब्ब्यांपेक्षा पोळी ठेवायला जे स्टीलचे डबे वापरतो तेही वापरू शकतो. खरवस उकडताना वर डब्ब्याचे झाकण न लावता ताटली ठेवावी म्हणजे कुकरमधून बाहेर काढताना त्रास होत नाही. खरवस हवेवर निवळला की डब्ब्याचे झाकण लावून तसाच फ्रीजमध्ये ठेवू शकतो.
३) साखरेपेक्षा गुळाचा खरवस जास्त खमंग लागतो. यात आवडीनुसार साखर किंवा गुळाचे प्रमाण कमीजास्त करावे.
४) वेलचीपूड ऐवजी जायफळ घातले तरी छान लागते.
५) खरवस उष्ण असतो त्यामुळे गरोदर स्त्रियांनी हे खाणे टाळावे.