निवग्र्या - Nivegrya

Nivegrya in English

वेळ: १५ ते २० मिनिटे
१०-१२ मध्यम निवग्र्या

गणेश चतुर्थीला नैवेद्य म्हणून उकडीचे मोदक हे हमखास केले जातात. मोदक बनवून झाल्यावर जर उकड उरली असेल तर या निवग्र्या बनवल्या जातात. तांदळाच्या उकडीला काही चव नसते. त्यामुळे त्यात थोडी मिरची जिरे घालून चविष्ट अशी निवग्री बनवता येते. यातून दोन हेतू साध्य होतात ते म्हणजे उकड वाया जात नाही आणि त्यापासून चविष्ट असा पदार्थ जेवणात खायला मिळतो. काही जणांना निवग्र्या इतक्या आवडतात की मुद्दाम जास्त उकड बनवून या पदार्थाचा आस्वाद घेतात.

साहित्य:
तांदळाची उकड - १ कप
२ टिस्पून हिरव्या मिरच्यांचा खर्डा
१/२ टिस्पून जिरे
चवीपुरते मिठ

कृती:
१) उकडीमध्ये मिरची पेस्ट, जिरे, आणि मिठ घालावे. नीट मळून घ्यावे. लिंबाएवढे गोळे करून चपटे करावे. किंवा गोळ्यात हाताचा अंगठा रोवून तसाच दाबत दाबत निवग्री वाटीच्या आकारात वाढवावी.
मोदक वाफवतो तसेच वाफवून घ्याव्यात.

टीप:
१) काहीजण हिरवी मिरची पेस्ट वापरण्याऐवजी लाल तिखट घालतात. तेही चालते. पण हिरव्या मिरचीचा स्वाद जास्त चांगला लागतो.