व्हेजिटेबल क्लियर सूप - Vegetable Clear Soup

Veg Clear Soup in English

वेळ: पूर्वतयारी: १० मिनिटे | कुकिंग टाईम: १०मिनिटे
वाढणी: ४ जणांसाठी

साहित्य:
६ कप व्हेजिटेबल स्टॉक
४ बेबी कॉर्न, थोडे जाडसर तिरके काप
१ मध्यम गाजर, पातळ तिरके काप
१ लहान भोपळी मिरची, चिरलेली (१ सेमीचे तुकडे)
६ मश्रुम्स, उभे मध्यम काप
१/४ काप कोबी, बारीक चिरून (१ सेमीचे तुकडे)
१ टीस्पून तेल
४-६ लसूण पाकळ्या, बारीक चिरून
२ टीस्पून लिंबाचा रस
चवीपुरते मीठ
३ चिमटी मिरपूड
२ टेस्पून पातीकांद्याची पात

कृती:
१) कढईत तेल गरम करून त्यात मध्यम आचेवर लसूण परतावे. गाजर आणि बेबी कॉर्न घालून मोठ्या आचेवर मिनिटभर परतावे. नंतर भोपळी मिरची, मश्रुम्स आणि मीठ घालावे. ३०-४० सेकंद परतावे.
२) व्हेजिटेबल स्टॉक घालून ३-४ मिनिटे उकळावे. शेवटी कोबी घालावी. मिरपूड, लिंबाचा रस आणि आवश्यक असल्यास मीठ घालावे. ढवळून सर्व्ह करावे. सर्व्ह करताना पाती कांद्याने सजवून द्यावे.

टीपा:
१) तेल वापरल्याने सूपवर तेलाचा पातळ तवंग दिसतो. ते टाळायचे असल्यास तेल वापरू नये. भाज्या व्हेजिटेबल स्टॉकमध्ये उकळवाव्यात.
२) जर व्हेजिटेबल स्टॉक नसेल तर नुसते पाणी वापरावे. चवीसाठी १/२ क्युब मॅगी मॅजिक मसाला वापरावा. यामुळे चव छान येते.