Gajarache Lonche

Carrot Pickle in English

वेळ: १०-१५ मिनिटे
१ कप लोणचे

साहित्य:
१ कप बारीक चिरलेले गाजर
१ टेस्पून मोहोरी पावडर
१/२ टीस्पून मेथीदाणे
फोडणीसाठी: २ टीस्पून तेल, २ ते ३ चिमटी मोहोरी, १/२ टीस्पून हिंग, १/४ टीस्पून हळद, १/२ टीस्पून लाल तिखट
एका लिंबाचा रस
चवीनुसार मीठ

कृती:
१) चिरलेले गाजर, मोहोरी पावडर, लिंबाचा रस, आणि मीठ एकत्र करून घ्यावे.
२) कढल्यात २ टीस्पून तेल घ्यावे. त्यात आधी मेथीदाणे तळून घ्यावे आणि एका वाटीत काढून ठेवावे.
३) त्याच गरम तेलात मोहोरी, हिंग, हळद, आणि लाल तिखट घालून फोडणी करावी. हि फोडणी एका वाटीमध्ये काढून ठेवावी. थंड झाल्यावर गाजरामध्ये मिक्स करावी.
४) मेथीदाणे बत्त्याने किंवा चमच्याने चुरून घ्यावे. गाजरामध्ये मिक्स करावे.
हे लोणचे जेवणात तोंडीलावणी म्हणून घ्यावे. साधारण ७ ते ८ दिवस फ्रीजमध्ये टिकते.