रताळे कचोरी - Ratale Kachori

वेळ: ४० मिनिटे
१० मध्यम कचोऱ्या

साहित्य:
१ कप उकडून कुस्करलेले रताळे
३ ते ४ टेस्पून शिंगाडा पीठ
चवीपुरते मीठ
तळणीसाठी तेल
सारण:
१ कप ताजा खोवलेला नारळ
३-४ हिरव्या मिरच्या, बारीक चिरलेल्या किंवा ठेचलेल्या
२ चमचे कोथिंबीर, बारीक चिरून
१५-२० बेदाणे
१/२ टीस्पून जिरे
१ टीस्पून तूप
चवीपुरते मीठ
१/२ चमचा साखर (ऐच्छिक)

कृती:
१) रताळे उकडून सोलावे. जर त्यात दोरेदोरे असतील तर चाळणीतून गाळून घ्यावे.
२) उकडलेले रताळे बोलमध्ये घेउन कुस्करावे. मीठ आणि शिंगाड्याचे पीठ घालावे. मऊसर गोळा बनवावा. १५ मिनिटे झाकून ठेवावा.
३) या १५ मिनिटात सारण बनवावे. कढईत तूप गरम करावे. त्यात जिरे, हिरवी मिरची, कोथिंबीर, बेदाणे आणि नारळ घालावा. मीठ आणि थोडीशी साखरही घालावी. नीट परतून कोरडे सारण बनवावे.
४) मळलेल्या पीठाचे १ इंचाचे गोळे बनवावे. लाटून छोटी पुरी बनवावी. आत १ चमचा सारण घालून कडा जुळवून कचोरी बांधावी. अशाप्रकारे सर्व कचोऱ्या बनवाव्यात.
५) कचोऱ्या मध्यम आचेवर तुपात किंवा शेंगदाणा तेलात तळाव्यात. झाऱ्याने कचोऱ्या हलवत ठेवाव्यात म्हणजे समान टाळल्या जातील. कचोऱ्या सोनेरी रंगावर तळून काढाव्यात.
हिरव्या चटणीबरोबर सर्व्ह कराव्यात.

टीपा:
१) कचोऱ्या गरमच खाव्यात. थंड झाल्यावर चांगल्या लागत नाही.
२) सारणात तळलेले काजूचे तुकडे घालू शकतो.