तिळाच्या वड्या - Tilachya Vadya

वेळ:  २५ मिनिटे
२४ मध्यम वड्या

साहित्य:
१/२ कप भाजलेले तीळ
१/२ कप किसून भाजलेले सुके खोबरे
१/४ कप भाजलेल्या शेंगदाण्याचा कूट
४ टेस्पून मिल्क पावडर
१/२ कप साखर, वरपर्यंत भरून
१/४ कप पाणी
१/२ टीस्पून वेलची पूड

कृती:
१) भाजलेले तीळ मिक्सरमध्ये भरडसर वाटा. पूर्ण पावडर करू नका. फक्त तीळ मोडायचे आहेत.
२) भरड तीळ, खोबरे, शेंगदाणे कूट, वेलची पूड आणि मिल्क पावडर तयार ठेवावे. टीनचा ट्रे तयार ठेवावा. आतून तूप लावून घ्यावे. जर टीन ट्रे नसेल तर पोळपाटाला तूप लावून घ्यावे.
३) साखर आणि पाणी एकत्र करावे. उकळी काढून एक तारी पाक करावा. यात वरील मिश्रण घालावे. ढवळून ट्रेमध्ये ओतावे. समान पसरवून घ्यावे. वाटल्यास वरून थोडे किसलेले खोबरे घालावे. प्लास्टिक पेपरला तुपाचा हात लावून खोबरे थोडे प्रेस करावे.
४) गरम असतानाच तुपाचा हात लावलेल्या सुरीने चौकोनी काप करून खुणा आखून घ्याव्यात. मिश्रण थंड झाले कि वड्या विलग कराव्यात.