मॅक्रॉनी उपमा - Macaroni Upma

Macaroni Upma in English

वेळ: १५ ते २० मिनिटे
वाढणी: २ ते ३ जणांसाठी

साहित्य:
१ कप मॅक्रॉनी
१/२ कप कांदा, बारीक चिरलेला
१ लहान टोमॅटो, बारीक चिरून
१ ते २ हिरव्या मिरच्या, उभ्या चिरून
१ टीस्पून तूप किंवा तेल
१/४ टीस्पून जिरे, २ चिमटी हिंग, ४-५ कढीपत्ता पाने
चवीपुरते मीठ
बारीक चिरलेली कोथिंबीर

कृती:
१) ५ ते ६ कप पाणी उकळण्यास ठेवावे. त्यात १ टीस्पून मीठ घालावे. पाणी उकळले कि त्यात मॅक्रॉनी घालाव्यात. ८ ते १० मिनिटे किंवा पाकिटावर दिलेल्या वेळानुसार उकळवून मॅक्रॉनी शिजवाव्यात. चाळणीत मॅक्रॉनी गाळून गरम पाणी निथळून मॅक्रॉनीवर गार पाणी घालून तेही पाणी निथळू द्यावे.
२) कढईत तूप गरम करावे. त्यात जिरे, हिंग, कढीपत्ता आणि मिरची घालून फोडणी करावी. काही सेकंद परतून कांदा घालावा. कांदा पारदर्शक होईस्तोवर परतून टोमॅटो घालावा. टोमॅटो चांगला मउसर होईस्तोवर परतावा.
३) आता मॅक्रॉनी घालून मिक्स करावे. चव पाहून लागल्यास मीठ घालावे. २ मिनिटे गरम करून कोथिंबीरीने सजवून लगेच सर्व्ह करावे.
हा उपमा लहान मुलांच्या डब्यासाठी चांगला पर्याय आहे.