ज्वारीचे थालीपीठ - Jwariche thalipeeth

Jowar Flour Thalipith in English

वेळ: २५ मिनिटे
२-३ मध्यम थालीपीठे

साहित्य:
१ कप ज्वारीचे पीठ
१ कप पाणी
१ मोठा कांदा, उभा पातळ चिरून
१/२ टिस्पून जीरे, १/४ टिस्पून हिंग, १/४ टिस्पून हळद
१ टिस्पून मिरची पेस्ट
२-३ टेस्पून चिरलेली कोथिंबीर
तेल
चवीपुरते मीठ

कृती:
१) पाणी उकळत ठेवावे. त्यात मीठ, जीरे, हिंग आणि हळद घालून मिक्स करावे. पाण्याची चव पहावी. थोडी खारट असली पाहिजे म्हणजे पीठ घातल्यावर मीठ बरोबर लागेल.
२) पाणी उकळले की त्यात पीठ घालून आच बंद करावी. नीट मिक्स करून लगेच झाकण ठेवावे.
३) १० मिनिटांनी मळून घ्यावे. मळताना मिरची पेस्ट, कांदा आणि कोथिंबीर घालावी. लागल्यास पाण्याचा हात लावावा. मोठे गोळे करावे.
४) दोन प्लास्टिक पेपरला आतून तेल लावून थालीपीठ लाटून घ्यावे. तेल सोडण्यासाठी २-३ भोकं पाडावी.
५) तवा गरम करून तेल घालावे. थालीपीठ टाकून मंद आचेवर २-४ मिनिटे वाफ काढावी. झाकण काढून आच थोडी वाढवावी. एक बाजू थोडी गोल्डन ब्राऊन होवू द्यावी. वरच्या बाजूवर आधीच तेल लावावे आणि कालथ्याने बाजू पालटावी. दुसरी बाजू खरपूस होवू द्यावी.
दह्याबरोबर किंवा लोण्याबरोबर थालीपीठ सर्व्ह करावे.