तांदळाचे गोड घावन - Sweet Pancakes

साहित्य:
३/४ कप तांदळाचे पीठ
१/४ ते १/२ कप गुळ (चवीनुसार घालावा)
१/२ कप ओलं खोबरं
चिमटीभर मीठ
भिजवण्यासाठी  पाणी (टीप पहा)
तूप

कृती:
१) तांदळाचे पीठ, गुळ, खोबरं, मीठ आणि पाणी एकत्र करून गुळ विरघळवून घ्यावा. डोशाच्या पीठाइतपत पातळ असावे.
२) नॉनस्टीक तवा गरम करावा. त्यावर तूप सोडून घावन घालावे. मंद आचेवर झाकण ठेवून २-३ मिनिटे वाफ काढावी.
३) झाकण काढून दोन्ही बाजूंनी घावन खरपूस करून घ्यावे.
घावन गरमच खावे. बाजूला थोडे कैरीचे लोणचे चव-बदल म्हणून खाता येते.

टीप:
१) ओलं खोबरं वापरण्याऐवजी नारळाच्या दुधात जर पीठ भिजवले तरी छान चव येते.
२) ही घावनं थोडी नाजूक होतात कारण गुळ आच लागल्यावर वितळतो. यामुळे नॉनस्टीक तवा वापरला तर तव्याला चिकटत नाहीत. हलक्या हाताने पलटवावी.