केशर फिरणी - Firni

Firni in English

वेळ: २० मिनिटे
वाढणी: ५ जणांसाठी

साहित्य:
६ टेस्पून बासमती तांदूळ
५ कप दुध
१/२ कप साखर
३ चिमटी केशर
३ चिमटी वेलचीपूड
८ बदाम
८ पिस्ते

कृती:
१) बासमती तांदूळ धुवून पुरेशा पाण्यात २-३ तास भिजवावेत. बदाम पिस्ते दुसऱ्या एका वाटीत भिजत घालावेत.
२) तांदूळातील पाणी काढून टाकावे. मिक्सरमध्ये बारीक वाटावे (मी थोडीशी रवाळ ठेवली होती). मिक्सरमध्ये वाटताना थोडेसे पाणी घालावे.
३) तांदळाची पेस्ट आणि दुध एकत्र करावे. जाड बुडाच्या पातेल्यात मिश्रण मध्यम आचेवर उकळवावे. तळापासून सारखे ढवळत राहा. कारण कच्च्या तांदुळाची पेस्ट तळाला चिकटते. साधारण ८-१० मिनिटे ढवळावे.
४) एकदा तांदूळ शिजला की शक्यतो तळाला चिकटत नाही. तांदूळ शिजला की साखर आणि केशर घालावे. मंद आचेवर ढवळत ५-८ मिनिटे फिरणी शिजू द्यावी.
५) फिरणी थोडी दाट झाली की आच बंद करावी आणि वेलचीपूड घालून मिक्स करावे. भिजवलेले बदाम पिस्ते सोलावेत आणि पातळ काप करावे.
६) फिरणी छोट्या मातीच्या भांड्यात घालावी. मातीची भांडी नसतील तर छोट्या बोलमध्ये वाढावी. वरून पिस्त-बदामचे काप आणि केशराच्या १-२ काड्या घालाव्यात.
फ्रीजमध्ये थंड होण्यासाठी ठेवाव्यात.

टीपा:
१) शिजवताना जर फिरणी खूप घट्ट वाटली तर थोडे दुध घालून कंसीस्टन्सी सारखी करावी. अधिकचे दुध घातल्यावर उकळी काढावी.
२) फिरणी फ्रीजमध्ये ठेवल्यावर अजून थोडी घट्ट होते. त्यामुळे फिरणी खूप घट्ट नसावी.
३) फिरणी बनवताना भिजवलेले बदाम-पिस्त्याचे काप आत घालू शकतो.